Kilala mo ako.
Makailang-ulit na tayong nagkasalubong sa daan, sa mga pasilyo sa unibersidad, sa mga mall at maging sa tindahan sa kanto. Makailang ulit na tayong nagkasabay sa mga jeep, bus, FX, MRT, LRT at maging sa paglalakad at pagpila.
Maaaring kaklase mo ako ngayon, o 'di kaya'y kaibigan ng iyong kaibigan. Ako ang lahat ng walang ngalang taong nakakasalubong mo, nakakasalamuha, at kung minsan pa'y nakakausap. Ako ang lahat ng taong hindi mo lubusang kilala, mga taong hindi kaiba ang mukha sa laksa-laksang nilalang sa daigdig.
Dahil sa bilis ng pagtakbo ng panahon, wala nang saysay ang pagkakakilanlan.
